無損心情打邊爐　阿Sa認輸得心服口服

蔡卓妍（阿Sa）於金像獎頒獎禮結束後，拉大隊與好友鍾欣潼（阿嬌）、馬天佑、組合Mr.成員Dash及經理人霍汶希（Mani）等，前往九龍城某火鍋店醫肚，眾人於大概凌晨一點半陸續離開。雖然剛剛失落影后寶座，但阿Sa也未見心情低落，在Mani和阿嬌陪同下離開，全程笑笑口的她，又大方讓傳媒拍照，阿嬌影相時更掩口自爆：「冇化妝！」

問到心情如何？阿Sa說：「Okay，頭先好肚餓，餓到爆炸，所以一出嚟就話要去打邊爐。」提到賽前獲外界睇高一線，她說：「我覺得已經好窩心，尤其播提名片段時，聽到好多人拍手同歡呼，嗰一刻有少少眼淚想湧出嚟。」今年影后寶座落入趙薇手中，阿Sa又表示未有感到失望，亦笑指輸得心服口服：「無論有冇獎攞，可以入大圍已經好感恩，可以行到呢一步已經付出咗好大努力，其他得獎嘅男、女演員，我都戥佢哋高興。」

阿Sa續說：「無論邊個攞獎都好，我都覺得係實至名歸！」當問到男友陳偉霆（William）有否傳短訊安慰時，其助手即打圓場說：「唔該晒！」並立刻拖阿Sa上車，阿Sa則邊行邊傻笑，未有回應，最後與阿嬌登上七人車離開。