張文慈罕有晒性感：依家唔使靠依樣嘢

藝人張文慈（Pinky）晚上出席首飾品牌周年晚宴，穿上白色晚裝性感示人的她，坦言已經好少咁性感：「盡量唔想太性感，因為依家唔靠依樣嘢。」Pinky又指所穿的是指定晚裝及飾品，並謂要尊重大會。

預咗亞視不獲續牌

提到亞視不獲續牌，Pinky表示有留意，並說：「每年亞視都會舉行亞視同學會，一班舊同事會約出嚟夾錢食嘢，我之前兩年都有去，但今年有嘢做。」Pinky又謂對不獲續牌早有心理準備：「無辦法，係會有少少唔開心。（覺得可惜？）每日出街都有人問，可惜就係可惜，總會有新電視台取代。」

爆亞視開天價嚇窒廣告客戶

對於有指王維基與亞視傾談，有意在亞視播放香港電視劇集，對此Pinky表示不願置評：「太多流言，所以唔畀comment，確定咗先，之前已經試過一次，令大家滿心期待。我對亞視管理好唔明白，無言！之前聽過有廣告想落亞視，但佢開天價，嚇窒咗人，我行政唔叻。」

曾因買股票輸二百萬

另問到Pinky有否玩股票，Pinky即自爆：「平生第一次玩，一日輸咗二百萬，係金融海嘯時期，點知輸身家，所以我同自己講唔可以再玩。炒股好危機，唔係好事，我會用嚟買樓。」