笑仔仔緋聞多　李思捷媽媽唔識黃心穎

李思捷媽咪馮筱儀今日到尖沙咀為自己第一次出的烹飪書舉辦發布會，原來今次能夠出書都因為她早前勝出無綫一個烹飪節目後獲出版商垂青：「準備咗一年，最難係拍攝，因為有少少片係教啲讀者嘅，例如點睇啲雞熟唔熟呀，火雞又應該點焗呀咁。（思捷有幫手？）佢有，佢幫手試食！」之後李媽媽更自爆自小入廚練得一身好功夫，16歲就參加公開比賽，雖然最後出局但依然開心。

李媽媽話春卷過氣

提到囝囝思捷的感情問題，媽咪就笑言：「呢啲係佢嘅事，我淨係照顧佢飲食。（有帶女朋友同你食飯？）佢成日都一班人一齊上嚟食我煮嘅嘢啦！（女朋友混埋喺入面？）嗰啲朋友我全部都識嘅。（黃心穎呢？）無喎，我唔識佢。（你唔心急飲新抱茶？）佢咁大個仔自己知道自己嘅需要，加上佢依家咁忙。（咁你對心穎印象如何？）今日唔關佢事喎，係講我本書。」不過媽咪亦笑言思捷緋聞多多，最近有胡杏兒、江美儀和萬綺雯等等，問到春卷？媽咪打趣謂：「呢個過咗氣好耐啦！」更坦言思捷從未帶過女朋友回家食飯！

江美儀爆黃心穎去過李家

江美儀亦有偕男友吳君祥到場支持，不過在訪問時就對記者笑言：「唔係淨係黃心穎上過李思捷屋企食飯架！我都有上過，你哋傳吓我同思捷啦，唔好淨係講黃心穎。」之後美儀更揚言男友大讚自己煮的海南雞飯是無敵，似乎對烹飪很有心得！提到工作方面，她表示現處休息階段，至六月才打算復工。