娛樂專題：周家蔚「做媽媽真係唔簡單」

周家蔚下月初將迎接第二個兒子出世，腹大便便的她現時仍要照顧兩歲的百厭星洪大仁（TJ），既是人母又為人女兒的家蔚，對即將來臨的母親節感受更深：「做媽媽真係唔簡單，係一份長期無休嘅工作！」

周家蔚與洪天明的兒子TJ經已兩歲，三年抱兩的她下月初再做媽媽，既是女兒身份，又將是兩子之母，令家蔚倍感媽媽這份工作殊不簡單：「第二胎其實比佗TJ時更辛苦，雖然識得控制飲食、體重，佗得輕鬆咗，但係要照顧冇時停嘅TJ，要照顧佢嘅情緒、心靈，又要帶佢返學、安排節目，所以佗第一胎仲有時間煲劇，第二胎連電視都冇時間睇，做媽媽真係幾攰！」

孩子大得太快

家蔚笑言稍後還要迎接最難捱的坐月時間：「我好怕悶，坐月一個月好似坐監咁，餵奶換片唔難，最難係要照顧TJ心理，佢仲細，唔會因為多咗個細佬而變乖！」她更已幻想兩兄弟將來會不時發生打鬥場面：「天明話佢同細佬都係由細打交打到大，男仔係好動都冇辦法，我都要習慣吓呢啲打鬥場面，買定啲膠布、藥水喺屋企。」談到對兩子的期望時，家蔚內心充滿矛盾：「唔係咁想佢哋做娛樂圈，但我哋成家都係娛樂圈嘅人，所以順其自然啦！」眼見兩歲的TJ日漸長大，家蔚不期然慨嘆兒子大得太快：「TJ頭腦都幾聰明，好似乜都知，依家仲識睇人眉頭眼額，成日都蠱蠱惑惑太醒目，小朋友都係多啲童真好！」

讚天明「稱職爸爸」

為人父母自然愛錫子女，家蔚寵愛之餘亦賞罰分明：「依家啲小朋友太聰明，真係要好好教，TJ做錯嘢我會罰，就算喊都要忍心照罰，最怕佢三歲定八十！」她又大讚天明是個稱職爸爸：「佢沖涼、餵嘢食都照顧得TJ好好，但係冇法啦，兩個小朋友使費都好多，佢依家好勤力咁喺內地拍戲賺錢。」

推童裝品牌　產後攻內地

將與老公迎接第二個兒子的家蔚，因兒子大仁的英文名TJ而成立自家童裝品牌TJ，家蔚表示最初並沒想過將興趣變成生意：「自己唔係想做商人，最初只係諗住設計啲服裝畀個仔着，後來慢慢發展變成一個品牌，當係送畀個仔留念嘅一份禮物。」

家蔚的童裝品牌TJ早前在荃灣開設分店，待生完第二胎後，她計劃將童裝品牌拓展到內地的龐大市場：「如果可以打入內地，產品除咗有質素仲可以賣得平啲，等多啲父母受惠！」

世上只有……

屬獨生女的家蔚兒時在加拿大長大，並與母親相依為命，她表示媽媽對她照顧得無微不至，經常陪伴在側及輔助她成長：「細個覺得媽媽好有威嚴，但係關係好好，乜嘢都會講，佢畀好多時間照顧我，我性格唔悶得，佢就陪我捉棋、問IQ題、打網球、溜冰、游水、學畫畫……媽咪好鍾意番茄，細個返學會摘啲番茄返屋企畀佢食，佢已經好開心，覺得個女好有佢心，媽咪都話我好乖，都算聽話！」惟家蔚於反叛期曾一度與媽媽關係生疏，但漸漸長大後又自然地再走在一起：「十幾歲梗係覺得同朋友啱傾啲，呢個係成長階段，但無論係點，我哋兩母女都唔會分開，媽咪依家返嚟香港住都係因為我，有佢幫我睇住個仔都好放心！」