爆老婆走佬　張繼聰靠兩千蚊生活？

藝人張繼聰以代言人身份出席手機App發布會，笑言平日與太太謝安琪購物會儲印花孝敬奶奶，記者笑指他有師奶習慣，他即解釋：「我從來唔儲，儲嚟唔係自己用，通常送畀媽咪、奶奶，好似好孝順咁，盡量喺呢啲位攞番少少分。」

張繼聰又自爆近日獲邀拍幾個廣告，問到是否豬籠入水？他笑稱所有錢都給予老婆看管：「佢依家夾帶私逃去咗荷蘭，留低一、兩千蚊零用錢畀我，唔知佢幾時返，我好驚，一陣都要搭巴士走。」並謂最近忙做舞台劇，五月頭便趕返上海，繼續拍攝電影《葉問3》。