宣萱嘆體重不復當年輕：年紀唔容許

藝人宣萱以愛心大使身份出席遺傳性癌症公眾教育活動，她表示一向有進行身體檢查習慣：「卵巢就一年檢查一次，呢個係必需嘅，至於乳房就唔使每年驗，年輕時三年驗一次，依家上身平均2至3年驗一次，下身就一年一次，不過都開始要驗密啲，因為年紀開始大啲。」

她又謂希望可多做關乎女性健康的慈善活動：「因為身體真係好緊要，但同時知道好多人都諱疾忌醫，可能人生經歷令我學識咗寧可早啲面對任何事。」

談到同場唐寧的產後瘦身問題，她慨嘆自己已回不到昔日體重：「舊年接咗美容院代言廣告時就117磅，但以前只係108磅咋，我相信如果自己有恆心做運動同節食，可以返到去呢個磅數，但係年紀唔容許我咁做，個人會太乾，不過都希望可以瘦番啲，但要健康行先。」

問到身為美容院代言人，有否曾被誘打Botox或進行醫學美容？她有保留說：「冇人叫過我打Botox，我覺得依家唔需要住，但Never say never，過多十年唔知，依家唔諗住，我覺得做面部提升同去斑已經對自己好有幫助，做適合自己嘅嘢。我仍然會繼續做多啲運動去保持個樣靚啲。」