娛樂專題:吳沚默編劇變幕前「醜」出新地

20150510
東網電視
更多新聞短片
編劇出身的Momo,為演好醜女角色豁出去。
娛樂圈索女如雲,不過吳沚默(Momo)就以「醜」聞名!編劇出身的她去年獲王祖藍提攜參演無綫劇《老表,你好hea!》,更憑醜角「烏筓」彈起!樣子清秀的Momo難以接受「醜樣」,幸獲曾演醜女的湯盈盈鼓勵!
吳沚默(Momo)去年憑劇集《老表,你好hea!》的醜角「烏筓」彈出,但實情她是編劇出身,更有份參與該劇的劇本創作:「因為我鍾意寫嘢,大學又讀電影,所以好鍾意呢一行,無論幕前定幕後都鍾意,尤其鍾意寫嘢,所以做咗編劇。」由王祖藍提攜做《老表》編劇的她,對祖藍心存感激,並大讚對方才德兼備:「祖藍有品德,又有藝術才華,佢唔單止表演方面好勁,仲想透過劇集發放正能量,同叫人重視親情,我覺得好好!」
險做長腿秘書
於《老表》中以粗眉黃牙醜女造型登場的她,自爆當初的角色設定本是祖藍的長腿秘書:「本身我冇諗過要做咩角色,但祖藍驚我做唔到戲,就叫我做佢秘書,好似有佢睇住會好啲,但因為要講好多對白,監製覺得一開始就講咁多嘢,我廣東話又唔太好,所以叫我試吓做『烏筓』。」
湯盈盈傳授「醜」技
雖然Momo口裏說不介意,但要接受自己的「醜樣」又是另一回事!她說:「第一日試完造型,見到上咗妝個樣,原來都係接受唔到!同埋個頭勁油,返到屋企要洗兩、三次先乾淨!」幸得同樣演過醜女「李笑好」的湯盈盈一言驚醒:「嗰日試完妝咁啱見到湯盈盈,佢一見到我就大笑!然後佢同我講嗰時演醜角,都係一化完妝就匿埋喺化妝間,因為佢唔想畀人見到佢個樣,但其實扮醜係好玩嘅!佢呢番說話鼓勵到我,令我豁出去!」
大學時代 訓練有素
一直在幕後密密寫的Momo,為何會突然投身幕前呢?原來一切只因在大學「訓練有素」:「我大學讀電影要拍嘢,但又冇錢請專業演員,所以同學之間互相幫手做演員,幫幫吓發現演戲幾好玩,就試吓考藝員訓練班。」結果成功在逾二千名參加者中突圍而出!Momo跳到幕前之後,即備受關注,更被網民火速起底,惟她坦言做演員安全感不大:「做演員係好玩,但要睇運氣,有時冇咁多嘢做就會驚。」她希望未來繼續兼任編劇及演員,讓她享受邊寫邊演的樂趣!