剖白「耍大牌」是非　G.E.M.決意洗底？

娛樂圈向來是個樹大招風之地，而打在鄧紫棋（G.E.M.）身上的風，從未停過。是咁的，就在這個風雨不定的五月，她所屬公司主動邀請《東網》獨家專訪這位風頭疐，究竟這個在是非中成長的小女孩有甚麼話兒，非說不可呢？

是非破新高

過去一年，G.E.M.贏得最多的掌聲，同時也聽盡無數人的喝倒采聲，「囂張大牌」幾乎成為了她的標誌，「其實我以前都多是非，但係去到今年，覺得破咗新高。同時呢一年，係我人生最精彩同人生最脆弱嘅時候。」G.E.M.說。

有時空穴來風未必無因，自從參加《我是歌手2》後，G.E.M.人氣連帶是非接踵而來，每途經中港台三地，總鬧出囂張、耍大牌的負面新聞。年初回到香港舉行的巡唱，本應算是衣錦還鄉，但最終成為最多是非的一站，事關其公司請香港文字傳媒吃閉門羹，加上經理人張丹炮轟傳媒，令到雙方關係幾乎有你冇我。

別人眼中囂到上太空的「宇宙天后」、「國際漿」，受到千夫所指後，G.E.M.終忍不住作出大平反：「我覺得自己一啲都唔囂張同大牌，一開始畀人攻擊，覺得係人哋收咗錢抹黑我，諗諗吓唔係喎，真係多得滯，會唔會大家真係咁覺得呢？啱啱入行時好細個，好多嘢都係公司幫我處理，我只係負責聽話，你叫我做乜就做乜。我依家會開始投入多啲，可能會關心吓公司點同傳媒接洽、安排係點，一個團體，我開始有我自己嘅意見，好多時溝通上要更加仔細。」

努力修補與港媒關係

如果命運能選擇，時間可以重來，G.E.M.可會用更好的方法處理年頭的「個唱風波」呢？她說：「人生冇Take 2，但我會一路喺唔同經歷成長，同時背後嘅工作人員都會成長，一定唔可以喺跌倒過程互相指摘，因為一個團體應該一齊去檢討，唔應將所有責任賴落人哋度，反而要將以後嘅嘢做好，呢個係更需要面對。」

有傷口自然便要找愈合的方法，要修補與港媒的關係，G.E.M.希望展示真誠一面來打動大家：「關係呢樣嘢最重要都係真誠，當人哋直接接觸到你，你係真誠定係講官方說話嚟氹人，呢啲係會直接感覺到。唔理咩原因都好，好多時都有人阻隔咗我同其他人嘅關係，我會將呢啲嘢攞走，直接將自己展示喺人前。」