紫霞仙子21年不變　Paul激讚朱茵靚到爆

歌手黃貫中（Paul）係圈中出名嘅「愛妻號」，最近老婆朱茵接拍網絡遊戲代言活動，廣告中佢仲扮番廿一年前喺電影《西遊記大結局之仙履奇緣》嘅紫霞仙子造型，手上掛住一串「啷啷」，仲拎住把寶劍，真係回憶都返晒嚟！雖然相隔廿一年，但朱茵再次着起紫霞仙子嘅戲服都依然咁靚，阿Paul當然post出嚟同大家開心share，佢仲話：「美成這樣，你老公心臟快受不了，練琴去...」阿Paul把口咁甜，唔知朱茵會點樣獎勵佢呢？