鄧萃雯到亞視錄影　第一次亦係最後一次？

藝人鄧萃雯（雯女）錄影亞視節目《下一站諾富》，她坦言首次踏足亞視大埔總台，在大樓行了一轉也碰到舊同事，對於可能是最後一次拜訪亞視，雯女坦言覺得今趟來得更有意義。問到會否不捨亞視結業？她說：「每樣嘢都有佢歷史任務，佢嘅任務完成，心情好矛盾，一方面覺得再咁落去浪費咗大氣電波，都想多啲選擇，另一方面佢陪住我哋成長、付出好多，所以會唔捨得，但每個時代變遷都要向前看，舊嘅唔去新嘅點嚟呢。既然都咁嘅情況，不如乾脆啲，等大家有新機會，諗啲新嘅嘢去刺激吓市場。」

雯女向學生分享如何面對人生高低潮，她自言未踏出社會工作時有許多幻想，但踏入社會後卻發現不一樣，又謂家人和學校所講的道理不容易實踐，她說：「我一入行就好幸運做主角，一嚟就已經好順利，年青人可能一入行就搵到好工，其實咁樣好危險，好容易變得好自大，依家年輕人細細個開始唔使捱，去到某啲困難、不順就好易承受唔到，我哋嗰個年代係捱出嚟，真係要搵食，唔係就冇嘢食、冇瓦遮頭，有乜唔開心都要啃咗佢，畀心機做好啲嚟令自己繼續上進，我哋根本冇條件放棄。」