網民熱話：人生大贏家Angelababy

女神Angelababy正式認嫁內地型男黃曉明，結束五年愛情長跑！消息一出，即成為城中熱話！年僅26歲嘅Baby，仍係青春少艾，但已經達到愛情、事業兩得意嘅地步。一嚟嫁得「高富帥」老公黃曉明，二嚟事業上又紅遍中、日、港，簡直係個活生生嘅「人生勝利組」！對於Baby人生路如此暢順，有眼紅嘅網民就不禁開Post討論：「Baby成個人生真係行運行到腳趾尾！」貼文一出，即引起熱烈回響！Baby人生到底有幾成功？今次《東網》晒冷畀大家聽！

1. 釣到金龜

女人只要嫁得好，覓得一個好伴侶，下半世可謂唔使憂！現時年齡只係二字頭嘅Baby，就已經釣得金龜婿。老公仲要係貴為內地「千億小生」嘅黃曉明，不但身家過億人民幣，去年更登上福布斯中國名人榜第5位。有錢兼靚仔之餘，曉明仲錫到Baby燶！未公開戀情前，曉明曾喺Baby生日當天，將成間房布滿玫瑰花，為Baby慶祝生日。而戀情公開後，兩人嘅甜蜜程度更爆燈！曉明不但送過名車畀Baby做禮物，又不時公開發表愛的宣言，例如：「愛情不能將就，她是要和我過一輩子的人」、「對她最好的方法是把她好好娶回家，好好的對待她就是最好的禮品」……試問有個咁錫自己嘅老公，有幾多個港女恨得到？

2. 白富美

眾所周知，Baby樣靚身材好，其外表有氣質已不在話下，而佢嘅23吋小蠻腰同樣令港女們相當羨慕！到底要的起心肝減肥幾多次，先會有Baby如此纖瘦嘅身材？至於身家方面，Baby同樣吸金力高強，而去年參與內地節目《奔跑吧兄弟》人氣急升，去年嘅收入更達4100萬人民幣（約5100萬港幣）。年紀輕輕嘅佢，未過30歲就搵到過半億。相反，對於一班網民就打一世工都未必搵得到！

3. 年少得志

2004年出道嘅Baby，當時只有15歲嘅佢就擔當兒童節目主持，已獲得唔少注意。之後短短五年來，未夠廿歲嘅Baby已火速上位，仲跳出香港，簽下日本模特兒公司，即刻升呢為香港本土首席o靚模！目前，佢更紅遍大陸市場，接Job接唔停，微博粉絲人數更高達5500萬，可謂名利雙收！另外，Baby亦係餐廳股東之一，仲撈過界創業，搞埋美甲店，事業雙管齊下發展！

一班網友眼見Baby已經喺短短十幾年，接近達到好多人心中嘅「人生目標」，仲有人問：「其實Baby人生仲有咩遺憾？」不過講多無謂，因為這些機會都只屬於Baby！

網民有話兒：

xxx得志：就咁睇人生好似無咩遺憾

Manxxx：人靚條路自然順

鄭xx：佢人生仲有咩目標？生仔？

15xxx：佢26歲已經做齊晒我想做既（嘅）野（嘢），而我仲做梗（緊）文員

xxx遺：曉明對佢好好