吳綺莉與卓林關係好轉：唔使心慌慌

藝人吳綺莉（Elaine）到電台開工，講到跟女兒卓林關係好轉，她謂開心些，心都定啲：「做嘢唔使心慌慌，早排都幾慌，呢兩日停低落嚟個人都散散哋，個女返咗嚟三日，個人冇咁緊張，反而呢兩日有胃抽筋。（返咗嚟一齊住？）係呀。（係咪傾多咗偈？）係呀，冇咁夠膽命令式同佢講嘢，佢話放學去睇戲，我話好呀好呀，你睇啦，睇完返屋企就得。（同學校方面呢？）都溝通得好好，同埋佢之前甩咗好多功課，學校都話暑假畀番佢做。（甩咗好多？）係呀，因為佢成個月去咗醫院同契媽嗰到，成個月冇返學。（驚唔驚佢追唔上？）我依家都冇迫佢，依家唔敢叫佢做功課，佢自己睇住自己，都咁大個人。（自己又舒服啲？）係囉，原來迫佢做功課都冇用，不如順其自然。」

她又講到稍後會拍攝單元劇《獅子山下》，其中自己會飾演有個女兒做model的媽媽：「個角色造型都有啲難度，因為個故仔好慘，屋企冇乜錢，好細個就嫁咗畀個黑社會，個黑社會之後又畀人斬死咗，但自己有個女，攞咗啲錢嚟買咗間有僭建嘅天台屋，後尾有精神病搞到癲哂，所以要揣摩下個角色，最後個角色仲要癲到自殺死。（驚唔驚影響情緒？）唔會。（會唔會帶情緒返屋企？）呢排都冇乜特別情緒，都有睇醫生，咩治療都試下，最緊要學識點消化啲嘢。（用畫畫可以減壓？）依家畫畫係反而好有壓力，因為我要交『弟子規』幅畫，有一年時間，依家要諗角色個樣，平時畫畫冇乜壓力，但愈想做好，就愈有壓力。」