網民熱話：錢小豪自轉N周秒速晾衫

武打星錢小豪最近於劇集《潮拜武當》亮相，上集提到錢小豪教兩位弟子點樣以「功夫」晾衫，播出後一班網民即驚歎佢神乎其技嘅晾衫技巧！基於呢個晾衫神技完全違反物理學原理，網民即推舉錢小豪為「TVB五大奇人」之一！

功夫晾衫　網民歎為觀止

晾衫向來被視為最麻煩家務之一，今次錢小豪就喺電視上展示點樣以秒速晾衫！首先，佢以四兩撥千金嘅招數，將木盆內嘅超長白布捲起，之後就將白布揮向兩位弟子楊怡及張景淳面前，並叫弟子接實。好戲在後頭，錢小豪旋即跳起，離地近一米半，再凌空使出跳水花式「轉身翻騰N周半」，成個身旋轉咗不下十次！就喺佢空中旋轉嘅短短一秒內，一條長白布就被扭到緊一緊，而附帶嘅水隨之四周散出，一班觀眾睇到歎為觀止！

天才網民聚集研究

對於錢小豪嘅晾衫神技，大家都覺得相當之不可思議！一班網民嘗試用物理學原理，探索佢點樣空中旋轉N個圈。更引來稱聲主修「航天科技」，甚至來自「外星聯盟」嘅天才網民聚首起來，並拋出物理公式「F=mrw^2」、「F=ma」等等，研究錢小豪嘅自轉奧秘！但最後得出嘅結論係，冇可能做到，仲話除非錢小豪係外星人啦！

錢小豪加入「無綫奇人」列

其實無綫早前已出過唔少「奇人實錄」，當中藝人謝天華於劇集《神鎗狙擊》中，單手爬山可謂最經典。同一套劇中，藝人徐子珊都曾以一身輕盈，撞破兼跳出厚玻璃。另外，藝人陶大宇曾喺《學警出更》於兩棟大廈中跳躍，而藝人關禮傑就曾喺劇集《叛逃》中表現「世界級跳樓」。四人匪夷所思嘅能力，令網民合封為「TVB四大奇人」，仲作出詩詞歌頌佢哋：「通臂神猿謝天華，橫練鐵布徐子珊，踏雪無痕陶大宇，飛檐走壁關禮傑。」今次，錢小豪嘅凌空翻騰，驅使佢入選「TVB奇人」聯盟！網民都表示恭賀：「佢呢啲神技先實用嘛！」、「終於儲齊五個人喇！」

網民有話兒：

Vincent xxx：因為自轉時既（嘅）其他人都圍住佢轉，所以可以咁做。利申 ： 主修航天科技

Harry xxxu：正確啲黎（嚟）講，自轉嘅向心力係F=mrw²　利申：主修物理...

Karl xxxg：阿媽： 搞乜鬼嘢呀！？ 一地都濕哂（晒）喇！！無果樣整果樣！！

姓x：阿媽表示：你識得啦，以後晾衫，你嘅。

Cxxx Jacky：前題家母要識空中轉十九幾個圈

Axxxonaut Randy：老豆（竇）表示咪玩啦