網上炒貴一倍　鋒味曲奇掀搶購潮

男神謝霆鋒出品的「鋒味」曲奇自推出後，隨即引起全城「鋒」潮，不少粉絲慕名而來，更有大陸粉絲專程來港「搶購」，在大陸淘寶網亦有網店將曲奇餅炒高雙倍價錢！

據知現在餅店實施「派籌制」，每個籌均可以買兩盒曲奇，每朝早都會有一大班客人在超猛太陽的街邊等候開舖。記者在開店前到餅店門口直撃熱購情況，現場出現近百人的人龍，主要以婆婆居多，其中亦有拖着行李箱的大陸客，直至上午十一時開舖前，仍然有不少客人蜂擁而至。

婆婆排隊60蚊一個籌

位於龍頭的婆婆表示自己六點鐘已經到門外等候，而龍尾就有自稱住在附近的婆婆排隊，她表示已經來了幾天，因為每盒曲奇餅有價有市，就算自己不吃都有人會「收貨」：「有人會買我哋啲籌，早幾日一個籌收60蚊，依家就40蚊，成日都唔同。」

婆婆話音未落，排前面的白領先生即時表示願意「收購」婆婆的籌號。而開始派籌後，餅店門外隨即出現四、五群「買家」，婆婆們爭相賣出自己手上的籌號，成功「出售」籌號的婆婆就會按買家要求入餅店買餅，再將曲奇交給「接頭」的買家。

換言而之，婆婆們從早上六點排隊等到十一點開舖，要捱着高溫企足五小時，假若當天一個籌只賣到六十元，即婆婆們每小時只賺得十二元，就連最低工資都不夠，為了這「十二蚊鋒味」，認真難為了一班婆婆！

惡男自稱大陸人發爛謾罵

記者上前訪問買了六盒曲奇的兩名買家，來自大陸的白衫男初時友善回應：「嚟咗幾日都買唔到，咪一次過買多啲，當手信送畀人。（代購？）我哋唔係幫人買嘅，全部自己送畀人。」但當記者打算離開時，白衫男竟突然發爛強搶記者的拍攝器材，更出言恐嚇記者：「如果你哋寫出嚟我就返大陸搵人砍你！」記者本想低調處理迅速離去，但白衫男繼續大罵：「你恰我大陸佬，唔係我哋買，你哋啲曲奇都冇人買！」再衝上前與另一名買家一齊用手機反拍記者，期間更有肢體衝突，喪追一條街後記者本想報警處理，不過兩名男士見狀即急忙逃離。

炒賣潮已持續一個月

記者事後電話訪問霆鋒的經理人霍汶希（Mani），講到近日餅店門外出現一班高齡婆婆排隊搶購曲奇，Mani直言當霆鋒知道很多婆婆為了五、六十元，而每朝等候近五個鐘後十分心痛，但同時亦心感矛盾：「霆鋒一方面想婆婆賺多啲錢幫補生活，一方面又擔心婆婆辛苦。」Mani亦講到深知到炒賣熱潮已持續一個月，但奈何要保持品質，每天都只能限量發售500盒。