苗僑偉否認擔正《使》電影版男主角

苗僑偉、鍾鎮濤（阿B）及阿B女兒鍾懿於電視城拍攝無綫節目《今晚睇李》的父親節特輯。期間苗僑偉透露剛於內地工作，打了數天哥爾夫球，所以曬出一身man爆的古銅膚色。談到父親節安排，苗僑偉自爆曾打算「人肉速遞」自己到外國與子女慶祝，可惜因工作而未能成行：「本應飛去搵佢哋，但走唔甩。（人肉速遞？）係呀！（若仔女飛返嚟送驚喜？）咁就真係驚喜喇！」他笑言應會與三嫂（戚美珍）撐枱腳食飯慶祝。

未知《使》電影幾時開拍

談到有傳《使徒行者》電影版將飛起林峯，由苗僑偉擔任男主角，苗僑偉作出否認：「流料，冇咁嘅事。TVB同電影公司仲係傾到好初步階段，我未收到通知幾時開拍。（有傳三嫂會做電影版監製？）都係流料，不知點解有呢個消息。（飛起林峯？）我唔知，如果開拍電影版係件好事，我希望原本班底再加一啲電影元素。有內地粉絲都好期待，但因題材敏感，內地審批較複雜，要搞掂劇本先落實到幾時拍。」

大讚胡國雄斯文又瀟灑

此外，提及前香港足球先生胡國雄於今晨病逝，苗僑偉表示可惜，又指對方為足球藝術家：「佢係球壇經典，由細個睇他踢波，到明星足球隊同他踢波。佢係足球藝術家，踢波冇犯規，斯文又瀟灑，值得球迷同球壇尊重。」