邵子風千字文解構三角關係

藝人楊詩敏（蝦頭）被爆撻着經理人邵子風後，大眾嘅焦點卻擺咗去邵子風嘅前緋聞女友龍小菌身上，多次傳出心情低落嘅龍小菌近日更被傳佢食緊精神科藥物。身為佢經理人嘅邵子風昨晚就喺facebook發千字文，親自解說佢哋三個人之間嘅關係。

首先佢澄清龍小菌並冇因為佢同蝦頭拍拖而唔開心：「小菌由上年重返校園，讀佢一直都好想讀嘅中文Master，雖然工作時間少左（咗），但係花多左（咗）時間響佢隊band度。我認為而（依）家呢個階段，反而係佢最開心嘅時間，更加會好好珍惜。... 無論食飯、睇電影首映，我地（哋）都成日三人同行，我地（哋）有拖拍，小菌不知幾替我地（哋）開心！」

另外，邵子風親證三人嘅友情由此至終都未曾變過，佢提到日前龍小菌涉嫌偷竊被捕時，蝦頭喺差館出面等咗成晚：「實在我地（哋）三個係好好嘅朋友，當前幾日所有記者守住差館外，將焦點放響小菌同我身上嘅時候，響差館對面嘅車上，蝦頭等左（咗）一晚，同樣好擔心呢個朋友。佢無入差館，只係因為唔想俾（畀）成班記者圍住，第二日又多嘢寫...」

邵子風又自爆，雖然佢係龍小菌同蝦頭嘅經理人，但佢哋之間未曾簽過任何合約，合作多年，都只憑一個「信」字：「一直以來大家公認我係蝦頭、龍小菌經理人，坦白講，實在咁多年來，我未攞過一份合約出黎（嚟）同佢地（哋）簽約、從來錢銀都係由我打點、從來無試過因為錢銀有矛盾！至於大家將會合作幾多年，我只係講笑就講過：『就20年啦！』佢地（哋）從來無異議，而大家咁多年來都係講過信字！」

最後邵子風更感謝龍小菌同蝦頭全力支持佢去追夢，實現兒時嘅演員夢。喺文末佢再次強調：「朋友就是如此！我地（哋）嘅友情，唔係你地（哋）外人三幾句說話就會講得明白。」