網民熱話：BOP新歌MV似足Big Bang？

本地MK-POP始祖，前名係天堂鳥嘅BOP，每逢一出新歌，都會即刻引嚟網民熱烈討論！繼佢哋隻首本名曲《登陸太陽》後，今首新歌《Playa Hater》MV一出，又成功吸引網友目光！因為唔少人都覺得個MV充滿住韓國人氣男團Big Bang嘅影子，有網民仲拆解埋《Playa Hater》同Big Bang邊幾……首歌相似！不過都有網友話佢哋呢首歌個MV幾有誠意嘅！

《Playa Hater》一開始三個人行出嚟嘅時候，就同Big Bang新歌《Loser》有幾分相似，都係一個一個咁行出嚟！可能真係咁橋啦！而跟住落去BOP個MV就設定喺黑白tone加廢墟嘅場景，同2011年Big Bang推出嘅歌曲《Love Song》有99.999999%相似，尤其兩個MV又有火堆又有路障嘅物體，齋睇畫面，真係會搞唔清兩首歌嘅分別！連啲色水都一樣咁！

其次，天堂鳥嘅MV當中穿插咗一位火辣Model，身穿黑色內衣嘅佢大擺誘人甫士！同Big Bang《Loser》唔同嘅係，個女模唔係着黑色內衣而係着白色！去到尾段喇，BOP喺個廢棄咗嘅工廠走出嚟，同Big Bang《Monster》尾段又不約而同有啲相似！真係唔知係咪咁啱喇！

不過有網友都讚佢哋個新MV好用心，覺得佢哋進步咗！咁其實BOP今次首新歌MV真係投放咗唔少心機同資源，佢哋「遠赴」澳門取景，喺著名嘅地標澳門旅遊塔以及氹仔大橋前勁歌熱舞架！話雖如此，有網友就話2012年Big Bang首《Blue》都同樣以大橋為MV背景，不過人哋係去咗紐約布魯克林大橋取景，投資方面就冇得比啦！仲有人話個BOP個MV型就幾型，但唱歌就……！個MV似Big Bang係咪好事？真係見仁見智喇！

網民有話兒：

gxxls：有d似bigbang，一開頭似loser，中間似love song，但好型啊（呀）

Laxxxxai： 型爆，首歌就麻麻地

angelraxxxat22：睇到佢地（哋）有進步，雖然5（唔）係fans，都為他們感到高興

Dxxxxnd xxi：未睇先Like，支持本地原創，兩個字一型棍，加油啊（呀）BOP天堂鳥！

Mixxxx16：咁又係，想型都係果（嗰）幾個感覺喇，冇乜嘅

G-Draxxxxxica：超似Bigbang D feel