李璨琛撇老婆夜蒲攬啜巨咪女

李璨琛（Sam）一向出名愛蒲愛玩，不過自從2012年同圈外女友梁志瑩（Pae）結婚之後，成個人生性晒，絕迹夜場之餘仲經常同老婆有影偕雙晒恩愛，估唔到喺凌晨時段，見阿Sam單拖重臨夜蒲熱點蘭桂坊，無老婆睇實嘅情況下以前嘅Sam返晒嚟，同一位「Deep V巨咪女」旁若無人咁又攬又錫，認真大膽！

約凌晨一時許，見阿Sam同三五位男女朋友喺夜場飲酒傾偈，阿Sam全程金晴火眼吼實一位身穿Deep V連身短裙，盡騷豐滿上圍嘅索女，有創意嘅阿Sam奇招盡出為搏「巨咪女」一笑，竟然畀佢諗到喺高級夜場玩猜枚，開頭「巨咪女」都有啲尷尬，玩吓玩吓佢哋就愈嚟愈放，為咗可以進一步發展，佢哋決定轉去一個環境比較暗嘅夜場度繼續玩。

轉咗場之後，佢哋兩個就更加激烈，阿Sam想同「巨咪女」影相留念，不過「巨咪女」就怕醜唔多想，阿Sam唔理咁多衝埋去從後攬實「巨咪女」，仲借勢一嘢錫落去，「巨咪女」即時防線盡失，佢哋仲旁若無人咁攬埋一嚿，飲多兩杯，「巨咪女」直接坐上阿Sam嘅大髀度卿卿我我，至凌晨五時左右閃人。阿Sam好明顯飲大咗，沿途不斷手舞足蹈，同「巨咪女」行行吓突然有途人認出阿Sam仲大叫佢個名，醉意甚濃嘅阿Sam即時嚇醒，即刻急步先行同「巨咪女」保持距離，仲走去同警察傾偈扮單拖，之後阿Sam打手勢示意「巨咪女」去暗角位會合，會合咗見無途人佢哋兩個又挨身挨勢，最後行到去僻靜嘅地方，阿Sam同「巨咪女」及一女友人一同登上的士離開。