網民熱話：《風雲天地》顏值任你評

新劇《風雲天地》緊接住《潮拜武當》播出，成為新八點半檔，尋晚終於正式首播。套劇由無綫同其他大陸製作公司攜手炮製，所以呢套合拍劇有汪明荃、黎耀祥、劉愷威、黃德斌、趙雅芝、蕭正楠等香港演員，亦有一堆大陸當紅演員，例如劉愷威同楊冪結婚時嘅伴娘唐嫣、女演員童菲、孟瑤等，上演家族爭鬥、充滿愛與恨嘅豪門故事。

依家晚晚八點半都要對住一班新面孔，又難怪網友大呼唔多習慣，仲轉移咗視線去研究眾演員嘅靚樣添～首先，網友大讚現年六十八歲嘅汪明荃有皮光肉滑嘅感覺，一定係駐顏有術，仲覺得汪明荃個妝化得唔錯。就連佢皺眉嘅時候，眼尾都唔多魚尾紋，十足食咗防腐劑！之後輪到劉愷威喇，身份係香港演員嘅佢，一早上咗神州搵人仔，仲娶埋內地當紅女星楊冪做老婆，成家立室。上個月喺大陸足足有五套劇同時喺九個唔同嘅電視台播出！稱霸完大陸嘅劇壇，今次殺返嚟香港，劉愷威個靚仔樣亦引來熱話。皆因成日話「女大十八變」，「男大七十二變」添呀！近年成日畀人話愈來愈型嘅劉愷威，相比十幾年前經典長劇《真情》入面做「叉燒炳」仔仔嗰時個樣成長不少，果然經過時日嘅歷練，成熟男人味都出晒嚟，感覺既英俊又穩重。

數到大陸代表，網友不停熱論唔太分得到劇中劉愷威細妹童菲，同埋飾演劉愷威女友嘅唐嫣。毫無疑問，兩位女演員都係眼大大、鼻高高、嘴仔細細同下巴尖尖。令網友都上網搜尋吓兩位嘅資料，睇返兩位以前嘅相，點知就有網友話：「個樣變幻過鬼影變幻球」、「劉愷威個女友個下巴好尖尖尖」。愈大愈靚都好正常嘅，更何況化妝技巧日新月異，化靚個樣先上鏡都係人之常情。不過講完靚，網友似乎對於《風雲天地》豪門恩怨嘅故事內容唔太睇好，大呼普通之餘，仲自嘲唔識欣賞：「我呢啲平凡俗人真係唔識欣賞，上網睇舊片他來自江湖好過。」

網民有話兒：

AnsaXXXX：劇情先係最大問題，一集都頂唔到

dndooXXX：我呢d（啲）慣性開電視等間屋有d（啲）聲，都頂唔住熄機。劉海（愷）威個女友同妹，好似都咁上緊款，個個似倒模人

coolXXX：唐嫣真係變咗好多，以前靚好多。

肉酸XXX：我都分唔到個妹同女友， 一路睇一路問，呢個妹定女友呀？

沙皇XXX：我呢d（啲）平凡俗人真係唔識欣賞，上網睇舊片《他來自江湖》好過