床上翻雲覆雨　袁紫僑許雅婷胸襲連場

女子組合少女標本的許雅婷（Kabby）與袁紫僑（CoCo）日前為新歌拍攝MV，劇情講述「兩女追一男」，她們原是一對感情要好的閨密，直到Kabby戀上男主角鄺俊宇，一直躲於「衣櫃」的CoCo終於傷透了心。拍攝當日其中一場大膽戲，是兩位美少女上演「床戰」戲碼，兩人典晒床之餘，情到濃時CoCo更從後胸壓攬實Kabby。

她們在鏡頭背後也是情同姊妹，未埋位前二人不時作狀錫錫，在床上攬頭攬頸。CoCo更大讚「女友」Kabby有手感：「攬住佢好舒服呀，同埋好香。佢都成日嚟我屋企瞓覺，但唔會攬到咁實瞓，大家本身都好好朋友，所以今次拍呢啲鏡頭好開心，唔會尷尬。」

問到現實中可有遇過同性追求？Kabby說：「我本身唔介意，覺得愛情冇分性別，試過有打扮成男仔嘅Tom Boy向我示愛，但我會以朋友感覺行先，表白嗰刻係好尷尬，覺得唔可以冇咗呢個朋友。」

至於CoCo亦同樣引到同性埋身，最後靠「暗示」拒愛：「以前我讀女校，有個女仔會幫我補吓功課，成日陪我周圍去，又會幫我孭袋，但我會擺出一個姿態話畀佢聽『我鍾意男仔』，提佢我哋只限做朋友。」她們又表示不介意將來在電影中飾演女同志，即使情節較激較大膽，也願意為藝術犧牲。