衞蘭衞詩簽新公司　孖住再戰樂壇

衞蘭Janice的孿生妹妹衞詩（Jill）自09年因為在日本藏毒被收押，返港後被當時所屬黎明的唱片公司Amusic放棄，遭提前解約，歌唱事業即時玩完。事隔多年Jill終於有機會重出生天，跟家姐Janice孖住一齊簽約華納！

衞蘭去年底約滿Amusic後，一直盛傳她跟多間唱片公司洽談，但條件之一是要簽埋妹妹Jill，令多間公司打退堂鼓，據知華納跟她傾了年多，終答應其要求，今午華納在官方facebook公布兩姊妹加盟的消息！

全文如下：

歌手衛蘭、衛詩正式簽約華納唱片，日前(25/6)二人到唱片公司正式進行簽約儀式，二人都表示非常高興可以跟大家宣布自己去向，而華納老闆Gordon Lee表示一直有留意所有的歌手，亦非常有興趣跟更多有潛質的朋友合作。

對此，衛蘭衛詩兩姐妹表示非常開心：「咁知道好多媒體朋友都好關心自己既（嘅）動向，期間亦都有唔同既（嘅）唱片公司同自己接觸，好開心最後同華納唱片簽約，覺得佢地（哋）係一間好有活力、好好玩既（嘅）唱片公司，而大家既（嘅）理念亦非常相近，希望之後會有更多既（嘅）好歌唱比（畀）大家聽。」

另外，對於不斷有歌手加入公司，華納一眾歌手表示非常高興及歡迎：「好開心見到公司越黎（嚟）越（愈）熱鬧越（愈）黎（嚟）越多人，相信黎（嚟）緊大家會有更多合作更多既（嘅）火花，希望可以帶到更多唔同元素既（嘅）音樂比（畀）香港既（嘅）朋友。」