楊思琦苦練槍法　開槍唔眨眼

藝人楊思琦早前在內地劇《暗戰危城》中飾演抗日女軍，槍法如神兼功夫了得，她說：「今次開咗好多唔同類型嘅長槍、短槍，有啲槍身好重，但我喺鏡頭前要表現到好英，開槍唔可以眨眼。除咗開槍，仲有動作戲，要踢腿過頭，我好耐冇郁，但為咗觀眾可以睇到演員真身演出，我都特登練番，希望個劇年底喺內地播嗰時，觀眾朋友會鍾意。」

思琦又謂拍劇期間最記掛囡囡，她說：「呢次拍劇返內地留咗兩、三個月，好掛住個女！不過成個拍攝過程都好開心，仲遇到班去影城參觀嘅學生，佢哋好熱情。（想學其他內地女星，有朝一日做埋製作？）我都係好初步啫，依家會多啲去了解、觀察，除咗因為做演員都應該了解多啲幕後外，將來有機會都會想試吓參與製作。」