黃家強澄清唔重組同朱茵生仔無關！

歌手黃家強為無綫節目《明愛暖萬心》擔任嘉賓，早前Beyond傳破冰重組開紀念慈善騷，事後家強聲稱「Beyond已成句號」，但近有有報道指重組騷臨門撻Q，原來是因黃貫中（Paul）太太朱茵欲追多個仔，對此，家強說：「我不嬲都話唔做，不論其他人有乜干預都與我無關，我只係自己唔做，唔知有乜干預，我都唔會考究。（朱茵生仔而撻Q？）男主外女主內，應該唔關事，唔好咁屈佢哋，大家開開心心過生活好啲。」他又指其太太性格樂觀、天真，從不干涉其工作。

嘆歌迷都幫唔到手

問到Beyond是否沒有機會再重組，家強斬釘截鐵重申：「係，唔會㗎喇，可惜都冇辦法，我唔想大家再問落去，再問都係冇，一次過講晒，冇，以後都冇！（擔心令歌迷失望？）我擔心嗰刻唔係呢個時間，我擔心係早幾年，以至早兩年前，一路都擔心緊，一路都想重組，一路都想做得開開心心、夾呢隊band，而歌迷亦諗好多嘢，但依家呢一步已經去到唔關歌迷事，歌迷幫唔到，我哋都幫唔到歌迷，根本係唔會成功，所以冇得擔心，我都擔心完。」