邀李思欣齊拍MV　范振鋒想將新歌送太太

藝人范振鋒擔任民族和諧活動的大使及司儀，並見證不同國籍的港人挑戰全球最大「人拼足印」健力士紀錄，他表示一直非常支持種族共融，以前讀國際學校的他更有不同種族的朋友：「嗰時學校都會有同學畀人歧視，試過有人抆啲印度人嘅頭包，我哋就會幫啲印度人出頭！」

曾親眼目睹人暴斃

提到日前台灣發生粉塵爆炸一事，曾在當地工作過四年的范振鋒覺得心痛，又提到自己平日到較多人的地方亦會特別警惕：「有時去count down、玩嗰啲都會驚，做嘢嘅話都會留意多啲身邊嘅嘢，例如逃生出口，做主持係會敏感啲嘅，有時見到啲機有煙出我都會即刻出聲。」之後他又透露多年前剛加入電台做主持時，曾經在一個籃球賽中親眼目睹參加者暴斃：「嗰個參賽者都後生嘅，可能佢打得太勁、太急，就當場暴斃，我係好近距離見到嘅，所以都有幾個月陰影！」

透露戴夢夢心情OK

除了主持工作外，范振鋒透露即將推出新歌，錄音工作已經完成：「如果個人發展嚟計都有十九年冇再出歌，今次有側田幫我作曲，嗰曲式就係情歌，不過歌詞就講我嘅成長經歷，好似以前啲脾氣比較差，結婚嗰啲都會講。」他又謂有意邀請太太李思欣參演MV，並想將歌曲送給對方：「好似梁漢文首《半邊生命》咁，係送畀另一半嘅，我有同佢講過話聽到眼濕濕。（太太聽咗未？）聽過，不過冇咩點眼濕濕，佢通常聽人哋啲歌先會。」

另外，范振鋒昨日到唱片公司開會時，他表示早前發生當街剝裙事件的好友戴夢夢亦在現場：「佢都係如常工作，心情OK！」