拍得古裝戲多？陳豪自嘲幫細囝改名似皇帝名

藝人陳豪和呂慧儀（長腳蟹）現身金鐘為新劇《潮流教主》拍外景，他透露該劇將於七月中煞科，又坦言恨帶囝囝去游水、坐船及主題公園，並謂：「本來想帶佢哋去主題公園，但時間唔啱，聽講小朋友時間有限，佢哋有schedule，又要瞓覺，又要做乜。（通常收工返去，佢哋瞓晒覺？）一定，有時朝早先收工，見到就同佢玩一陣，佢以為我陪佢食早餐，但我話爸爸要瞓覺，佢嗰種眼神依依不捨，好『銳』（心痛）。」並謂太太陳茵媺（Aimee）湊囝辛苦，希望自己快點得閒分擔責任，一家四口出埠去旅行。

將來想囝囝去外國讀書

談到最近多病菌，陳豪直言擔心兒子惹病，又指大囝早前已患病，故會更加小心：「唔關人多事，小朋友返學之後，好多病控制唔到，唯有增強佢哋抵抗力，令身體好啲。」他又稱為已返playgroup的大囝，於年前報讀幼稚園。問到明星家長有否得到着數？他笑謂：「冇，我以為有，反而咁樣公平啲，一視同仁，佢哋係追求父母帶乜環境畀小朋友，好講求父母與子女嘅關係。（你有上course學同小朋友面試？）冇，K1、中一嘅面試仲緊張，所以我哋有排擔心，我唔排除畀佢哋去外國讀書，但等佢哋大啲先，相信要擴闊視野。」

改名改到頭都大埋

提到細囝終於改命陳浩鋒，陳豪自言有幫手，但笑道：「係我唔好，改到古裝名、皇帝名咁，花咗好多時間砌。」