惹網民不滿　朱慧敏疑被《愛》大結局抽水

無綫處境劇《愛．回家》昨晚播出大結局，劇集末段講到黎諾懿飾演嘅馬壯自己一個去坐電車，之後就回憶起佢同朱慧敏（Queenie）嘅角色Alex喺電車上嘅對話，Alex當時拒絕咗馬壯嘅求婚，仲對住馬壯講：「你相信我，你依然是我的終點，我們會有結婚那天的，只是我想慢一點。」呢一幕不期然令大家諗起前EO2成員彭懷安（Eddie）喺今年五月被拍得夜會索女，朱慧敏因而要同Eddie延遲婚期，劇中同現實都延遲結婚，網民都大叫無綫向Queenie抽水！

當馬壯回憶完落咗電車，之後佢就同Alex喺街上相遇，二人相望而笑，大結局就咁完咗，究竟馬壯同Alex最後有冇喺返埋一齊真係冇人知，當大家都好期待Alex出現嗰陣，點知Alex只係出現咗幾秒，仲要一句對白都冇，令到唔少網民都好不滿，有網民話：「Alex究竟做得有幾錯要一句對白都無份，咩都無交代過不如唔好叫佢出嚟，笑一笑 點頭即係想點呀」。

而Queenie今日亦有喺微博留言，多謝大家一直咁支持佢同劇中角色尹德如，佢寫道：「天下無不散之筵席，曾經遇見，就是美好。願我們珍惜眼前人，活在當下，心懷感恩，明天一定會更好。尹德如和Queenie謝謝大家的愛與支持！祝安康，順心愛你們。」