馬國明爆周麗淇想搵外國人生B

藝人馬國明和周麗淇（Niki）在將軍澳電視城拍攝無綫新劇《流氓皇帝》宣傳片，期間Niki更拉起馬國明眼角，搞到男方頓變外星人Look，相當搞笑。有指此劇是力谷收視的「救亡劇」，馬國明就指沒有關係：「依家要救咩？（《風雲天地》21點。）唔係救唔救亡嘅，咁啱啫。」亦透露劇集會在8月3號首播。而Niki就笑指兩人主打天然路線：「可能呢套係喜劇，會着數啲。」馬國明則指暑假推出此劇會適合小朋友睇：「呢套劇啱一家大細睇！」

問馬國明是否成日撩Niki玩，馬國明笑謂：「我成日撩！」Niki續謂：「佢公認啦，個個女仔都撩，連姐姐、姨姨、嬸嬸都撩！」更叫馬國明不要太濫，要檢討，令男方即謂：「我聽吓麗淇話啦！」

談到家姐周汶錡生B仔，Niki就指自己日日都有到醫院探她們兩母子：「BB個樣每日都唔同！」又指家姐即將出院。而馬國明就大爆Niki想找外國人生B，令Niki兜番指自己覺得B仔輪廓深：「出世第一日已經擘大眼望住我。」馬國明一聽到就即時口花花：「即刻識望啲靚嘅嘢！」認真搞笑。