鄭俊弘準備火辣開騷　自爆半裸漏兩點

歌手鄭俊弘（Fred）以一身紅色西裝現身演唱會記招，獲老闆、製作單位和贊助商等人現身支持，而場外亦有近百歌迷支持Fred。

受訪時Fred講到繼上年十一月後，今年九月將再舉行第二個個人演唱會，覺得很興奮和很幸福：「多謝主辦單位，仲有公司冒呢個險，畀呢個信心我開騷。（公司係咪好錫你？）多謝老闆。」講到今次票價最貴是600元，比上次貴了20元，他笑稱票價升幅合理。他亦透露現時正錄製第二隻碟，到時演唱會會獻唱新歌，仲表示演唱會命名為紅色演唱會，是因為代表自己對音樂的一團火：「希望觀眾可以聽到同feel到我個團火，同埋經過左一年，自己都成熟左，希望個騷可以表達到出嚟。」講到今次演唱會新元素，他透露上年沒有跳舞，故今年想試跳舞，問到可會跳辣身舞？他即笑言：「自己同自己辣身呀？不過依家都confirm咗有幾首歌會跳舞，但就唔會跳到好似K-pop咁勁，係會groovy啲。」

Fred表示現在會好好鍛練身體，今年更特地請了個教練幫自己操弗：「都希望到時可以多啲嘢睇，同自己可以有啲突破。（會唔會爆肌演出？）爆肌就唔會好直接正面咁爆，但隱隱約約都會有啲。（接受唔到好似杜德偉咁脫掉？）我冇佢咁有本錢，不過依家都有努力每日跑步同做gym，希望到時會有成果畀大家睇。」而問到可會半裸露兩點？他口快快咁講：「會同導演、造型師夾一夾睇下點樣帶呢點出黎。（即係邊點？）即係點樣去帶呢part出嚟。」至於嘉賓方面，他則謂未確定，仍在夾大家的期。問到下次再開個唱會否想進軍紅館？他即渴望地說：「呢個真係絕對係目標，希望下次開演唱會可以喺紅館搞。（想幾年內完成呢個夢想？）兩年內，希望！」