Kary自揭狼吞虎嚥食相　仲要着住婚紗？

已「升呢」人妻嘅歌手吳雨霏（Kary）上星期同老公洪立熙（Brian）喺意大利舉行婚禮，Kary仲邀請咗幾位昔日Cookies嘅隊友兼好姊妹出席，包括鄧麗欣（Stephy）、楊愛瑾（Miki）及區文詩（Angela）。

不過咪睇一班女仔着到靚靚咁出席婚禮，就以為佢哋一定儀態萬千，呢日Kary就率先自揭狂野真面目。

佢上載一張婚宴期間被偷拍嘅相，相中Kary擘大個口，大啖大啖咁食扒，完全懶理自己身穿婚紗，Kary更留言表示：「對，是必須的。」梗係啦！影咗成相，搞婚禮又搞足一日咁攰，「食咗先講」絕對係人之常情，不過唔知Brian見到之後，會唔會嚇親呢？