坐月周汶錡包到冚　囝囝眼仔睩睩超趣緻

名模周汶錡（Kathy）月初剖腹誕下囝囝Jacques，呢日就有一班好朋友去探佢哋兩母子，友人仲留言大讚小Jacques好靚仔：「天下第一美男BB非他莫屬！謝謝Kathy的愛心薑醋，雞酒，紅米薑絲飯佐香檳和賀禮曲奇，太窩心的一個下午。」

可能遺傳咗Kathy強大嘅模特兒基因，小Jacques面對鏡頭時都好淡定，眼仔睩睩十分趣緻。相反仲係坐緊月嘅Kathy，就唔單只由頭包到落腳，影大合照時佢仲冇望到鏡頭添。不過有網友表示渾身散發母愛光輝嘅Kathy，睇落別有一番美感！