楊千嬅爆囝囝對住父母兩個樣

歌手楊千嬅出席商場活動時，即席與小朋友一起大玩以尋找快樂為題的遊戲，盡顯母愛！她表示已為囝囝Torres報讀興趣班，以玩樂為主，續說：「係運動嘅班，游水、打網球，佢唔識打，但可以畀佢同其他小朋友玩同溝通吓，對佢好重要，因為佢今年升K1，交流係需要培養，依家盡量陪佢益智啲，但自己其實都好內疚，因為仲有啲『債』要還，呢個暑假要周圍飛，冇咁多時間陪佢。（要做咩？）真人騷仲要飛多一次，又要拍戲同拍廣告，逼晒係8、9月，呢幾個月都帶唔到佢去玩，寄望聖誕啦。」她續笑稱去年忘記拿囝囝的手冊來策劃工作安排：「上年蠢咗冇拎佢本手冊嚟hold定啲假，依家會，已經攞咗，同埋年尾我忙埋巡迴演唱，之後啲工作會疏落啲架啦。」

唔捨得出門口　成日遲到

問到囝囝是否已習慣自己經常出外工作？千嬅表示：「佢以前細個啲嗰陣唔理我，依家識性會有情緒，會嬲架，當你出門嗰陣，佢會望實你，同有兩泡眼淚。（你會唔會唔捨得出門？）會架，所以咪成日遲到，有次開會遲半個鐘，見到個仔咁真係出唔到門口。」她又謂囝囝面對老公丁子高時，則是第二個樣子：「佢會話bye bye。（咁佢咪好傷心？）佢唔會呀，佢個角色係同囝囝玩，成日玩到好肉緊咁錫佢，囝囝話『你錫我得，錫姐姐（工人）先』，老公就會話『我錫媽咪』，阿仔就會話唔得，佢明知老公唔會錫姐姐，好叻，阿仔對住佢真係第二個樣，會低能晒同傻晒。」

千嬅透露現非常擅於跟小朋友相處：「我依家好叻對細路仔，大部分接嘅工作都係關於小朋友、餵哺母乳、保護兒童、教育。（會唔會出書？）唔得閒住，冇時間呀，分享傾吓偈OK，咁formal去出書真係唔得，唔夠時間。」