父親今設靈　吳卓羲承諾盡快復工

藝人吳卓羲（Ron）父親吳振英早前因胰臟癌離世，享年72歲，而吳卓羲今日就在紅磡萬國殯儀館為其父設靈。披麻戴孝兼雙眼通紅的他情緒仍未平復，他透露父親離開時，自己也在他身邊。而爸爸的心願是想他抽時間回故鄉中山與親戚見面。不過Ron打算將父親安葬在香港，他說：「葬喺香港，自己想拜佢時方便啲，中山嘅親戚都成日嚟香港。」談到與父親的難忘事，他就指小時候特別多：「我細個好百厭，所以大個就錫佢多啲。」

Ron被問到是否最近都要請假？他謂：「搞咗爸爸嘅事先，其他嘢再諗。」他又知無綫亦知道他喪父，沒有催他傾續約，他透露：「但合約就完咗架喇。」他又指會盡快復工：「都停咗好耐，處理完爸爸嘅事都會Follow番工作嘅嘢。（邊日正式復工？）都差唔多架喇，冇話正式係邊日。」