郭政鴻嘲浮誇　陶大宇無意搶鏡：求其演

由陶大宇、劉明軒及王曉君主持的有線節目《我愛煮食男》最新一集請來邵仲衡及郭政鴻擔任嘉賓，「三蟹」重聚，不忘大談當年拍攝神劇《大時代》的苦與樂，二十年兄弟情充滿默契。

為迎合愛吃蟹的郭政鴻，大宇特意炮製「泰國咖喱炒蟹」，眾人大讚賣相及味道都可媲美泰國餐館，郭政鴻說：「識咗大宇咁多年，都唔知佢識煮餸，我以為佢只係識做戲。大宇嘅演技係我哋幾兄弟中最浮誇嘅一個，幕幕都七情上面，係非常搶戲同突出嘅角色，好多場面都成為今日經典。」大宇則解釋那只是「求其演」，並沒有刻意搶鏡，惹起全場大笑。

感激大宇提攜

不過郭政鴻感激當年紅爆的大宇非常照顧他：「當年我嘅角色對白唔多，大宇好主動分對白給畀我講，等我有多啲發揮機會，即使記者訪問佢，佢都會主動叫埋我一齊影相，畀我見報。直至今日，我都好感激佢嘅提攜。」大宇笑言無論政鴻做甚麼決定，成功與否，都會無條件支持佢，足見二人有情有義。