唔識我？蔚雨芯還擊李逸朗：以為佢係新人

「魔鬼胸」蔚雨芯（Rainky）現身書展支持潘昭聰的靈異新書簽名會，姍姍來遲的她還即席分享親身撞鬼經驗。她透露早前去武當山拍攝劇集《潮拜武當》時，首次經歷靈異事件：「之前咁大個都未接觸過，前排去武當山見到有間廟，有好多神像就拜下，返到酒店，有同事同我講背脊有兩點，我就話可能係自己整損咗，跟住返到香港屋企照鏡，睇落唔係撞損、唔係結焦，好似胎記咁，咁咪影張相send畀師傅睇，佢問我係咪曾經拜咗個黑色神像，我話係，佢話黑面神，話入廟唔可以亂拜神，師傅話嗰兩點係一對眼，我話會唔會係咁跟住我，佢話整蠱我架啫，做咗場法事，3個月就慢慢淡咗。」

她又表示將跟潘昭聰合演舞台劇《消失的女孩》：「自己都緊張，因為真正喺劇院做，會怯，同埋我天生唔係陰陽眼，希望唔好再撞到（鬼）。」問到早前有機會跟歌手李逸朗合作電影，有否因對方指不認識自己而感尷尬？她說：「唔會，唔怪佢，我之前都唔知接咗電影，本身話客串，再變第二女主角，不過推咗啦，同埋可能佢之前返咗內地發展，我啱啱出道。（會唔會努力啲做畀多啲人識？）我以為佢係新人，原來佢出道咗10幾年，佢唱《傻女》嗰陣仲以為佢係新人，唔緊要啦，我下次唱返首《傻仔》囉。」