阿仔笑戇居！張繼聰忍住：你咪同我一樣

藝人張繼聰及唐詩詠到大埔出席「新達廣場xRody夏日沙灘派對揭幕禮」，兩人更向觀眾大派禮物。阿聰表示在家中角色負責「戶外部」，每逢夏天都會帶兒子到沙灘玩，但老婆謝安琪（Kay）怕曬黑所以較少同行，又謂：「同埋佢一去好易畀人影到，走唔到！」問到去沙灘會否穿三角泳褲？他笑說：「我多數着衝浪褲嘅，因為同小朋友玩好體力勞動，佢玩橡皮艇係靠我發動嘅，又要抬嚟抬去，所以都要做足預防措施，我怕男人都有機會走光！」他又指兒子正在學溜冰和踢足球，自己間中亦會陪同，之後又讚Kay厲害：「依家我要拍劇，有時就由佢陪個仔踢波，我之前都差啲中暑，所以母愛真偉大！」

提到新一輯《愛‧回家》的獨白畫面被指抄襲韓劇，身為主角的阿聰解釋：「其實我讀演藝嘅時候好多希臘劇、莎士比亞嘅劇已經有呢種處理手法，冇話邊個抄邊個，不過都好嘅，起碼啲網民都叫有留意吓！」而今年將舉辦做歌手十周年演唱會的阿聰透露九月將開始宣傳，現正忙於開會和揀歌：「今年仲會有兩首新歌，過程都幾開心，又聽番好多自己以前嘅歌！」他又提到近日重播自己多年前做童星時的劇集，而兒子亦有觀看，更取笑他的樣子戇居：「因為嗰時我仲發緊育，係有啲戇居嘅。（佢認得你？）認得！其實咪同佢自己一樣，我唔忍心同佢講你話我戇居，你咪同我一樣！」