網民熱話：個個撞邪？紅星全「反白眼」！

近日潮流興玩「反白眼」手機App，連型男黃曉明都玩埋一份！佢用呢個App將同佢合照嘅人都變晒做「反白眼」，連老婆Angelababy（楊穎）同一眾圈中好友無一倖免被惡搞。之後，唔少玩得嘅中港台藝人都唔怕「醜樣」，齊齊大玩「反白眼」App！而「夫唱婦隨」嘅Angelababy當然有玩埋一份，佢不顧女神形象嘅舉動，獲得唔少網民大讚「玩到出神入化」、「反白眼最成功嘅例子」！

而另一個潮爆嘅藝人莊思敏亦有玩依個App，佢仲惡搞埋身邊嘅朋友，認真大整蠱！而台灣型男郭品超亦同蔡淑臻一齊「反白眼」，仲話：「聽說這是現在最時尚的拍照表情」網友見到都留言讚佢哋「玩得」，又話「一大班人嘅合照整到個個反哂（晒）白眼都幾搞笑！」

不過，唔係個個都「反白眼」成功嘅。好似喺內地電視劇《甄嬛傳》中飾演「華妃娘娘」、原被封為「反白眼始祖」嘅內地演員蔣欣日前試玩依個手機App，但係就可能因為捉唔到個神髓，反而展現唔到劇入面嘅反白眼功力，仲畀人笑佢目光呆滯添！

網民有話兒：

XXXXni-kx：估唔到Angelababy都玩埋一份，仲玩得咁出神入化。

哥XXXX：其實一大班人嘅合照整到個個反哂（晒）白眼都幾搞笑！

NXXXTY：d（啲）明星靚仔靚女就反白眼都好睇嫁（o架），我地（哋）d（啲）普通人玩實好醜樣啦！

akXXX：可能我反咗眼會仲靚囉！