李璨琛為夜蒲攬女認衰：我會檢點啲

藝人李璨琛（Sam）出席音樂劇首演禮。上月底被《東網》踢爆夜蒲攬女的Sam遇見記者即自動投案：「問啦…要問嘅始終都要問。」當記者想入正題時，Sam又反口話要先講音樂劇，有份為音樂劇配音的他表示已是第五次配音，不過音樂劇是第一次：「都有啲分別，相對卡通片唔使咁仔細，又唔使夾口型，都唔係太難。」

談及攬女事件，他說：「出去玩係會有呢啲情況，音樂又大聲，傾偈好自然要近啲，嗰晚都飲多咗啲酒。（醉？）有少少。」對於被拍到攬腰錫面，Sam即說：「我會檢點啲！」問老婆有否怪責他？Sam說：「冇！」期間助手護航，制止記者發問，但Sam繼續說，並強調現在家庭和諧，沒有影響感情：「我哋依家好和諧。（玩少啲？）我會檢點啲！（同老婆約法三章？）我會檢點啲！」