【超重30磅】巨肚湯盈盈呻無啖好食

腹大便便的湯盈盈帶住囡囡現身音樂劇首映禮，盈盈表示現已佗有七個月身孕：「六個月嗰時醫生已經話過重，超過咗30磅，叫我唔好食咁多，其實都幾慘，叫個大肚婆唔好食咁多。」

講到好姊妹姚樂怡默認懷孕，盈盈即恭喜對方：「好開心，三個姊妹一起大肚，Margaret（鍾麗淇）都有咗第二胎，好想催文女（文頌嫻）生多個。」問到是否要催余詩曼快啲生，盈盈笑言她已是很多人的契媽。

過兩招畀姚樂怡

問到可有過兩招給姚樂怡？她表示：「有啊，大家同時間有咗，佢仲問我奶樽要消毒架咩，明明我第一胎個奶樽消毒機係佢送畀我，佢又唔知咩係B1、K1，問我係咪學校名，好好笑，好似以前自己咁。」她又笑言樂怡見到自己食辣嘢覺得好驚奇：「我依胎佗得好壞，又食辣嘢，有時啲梳打類嘅甜嘢，因為天氣熱，老公又喺隔籬飲，我都忍唔住。」問到可會幾個媽媽一齊影BB相？她表示會與Margaret一齊搞迎接新生兒的派對：「遲啲一齊去BB展，同Share陪月，輪流陪我哋。」