林欣彤走出陰霾　為夢想向前

歌手林欣彤（Mag）最近推出首張EP，一直出開大碟的她坦言因為EP較少歌，故主題可更集中。而是次EP的主題是成長，歌曲所講的都是Mag的個人經歷，如《金剛圈》和《小花》則是與她早前患上抑鬱症有關，其中《金剛圈》則是講述嫲嫲患上腦退化症和中風，但她卻仍努力追夢，慚愧自覺丟棄了嫲嫲，因此寬恕不到自己而弄得自己患病：「覺得令嫲嫲好唔起嚟我就衰落去，以為係放慢步伐陪緊佢，嗰陣迫到自己有情緒病。」幸好最後自己被真愛拯救出來，才能走出抑鬱症的陰霾。而講到嫲嫲現時身體狀況，Mag自爆有段時間曾害怕探嫲嫲：「因為覺得佢唔同咗，但依家覺得佢都係一樣，只係好似變番個細路仔咁，佢依家雖然都係講唔到嘢，但係健康穩定嘅。」

而講到一手包辦曲詞的《小花》，她表示該曲隔了很久才完成，頭一半是患上抑鬱症期間創作，當時她感到跟世界脫軌，覺得世界容不下她：「嗰陣每日喺屋企都好唔開心，唔想成首歌都係咁，於是寫到一半停低咗，我想有一日有出路先寫埋佢。」而後一半就終於在幾個月前完成了，已成功戰勝病魔的她坦言：「睇番之前嗰啲詞嘅時候，發現其實自己咪就係嗰朵小花，而嫲嫲就係小花隔離嘅一塊枯葉，佢曾經喺樹上努力求存，跌下亦非隨便，佢跌落嚟最後都會成為我嘅養份。」

出完碟自然會想舉行音樂會，Mag坦言自己都不例外，無論甚麼類型的音樂會都想舉行，不過最想舉行的當然是個人演唱會，那可想登上紅館開個唱一圓夢想？她甜笑直言：「好期待有呢日，不過暫時冇定幾年內可以做到呢樣嘢，自己prefer順其自然。」至於講到21號剛踏入25歲，貪靚的她坦言生日願望是青春常駐和健康：「希望自己個樣成日keep住係咁嘅年齡，二嚟希望開心健康，最緊要。（想快啲拍拖？）冇得咁諗架，太希望件事會夾硬，太倉卒唔係好事。」