劉嘉琪硬淨Madam撐得住　

模特兒兼演員劉嘉琪（Kanice）最近喺無綫拍劇時飾演女警，佢話自己性格硬朗，所以演Madam冇難度：「我個人比較硬朗，所以唔太難演！不過有時要跑得好快，又有啲爆破場面，就要小心啲！」Kanice透露唔係第一次着警察制服：「之前拍《飛虎》都係做Madam。最辛苦係腰間裝備好重，夏天天氣又熱，返屋企發現腰間磨到損晒。」

而問到拍劇最深刻經歷，佢話：「之前拍《陪着你走》時，做麥包前妻，劇情講到我哋就離婚，我要喊！試戲時，我就喊到癲，但到嚟真嘅時候，我就發現眼淚已經用晒！之後監製教我試戲拎5、6成就得，真正拍先放盡。多謝佢畀機會我呢個新人！」Kanice又直認自己情緒化，成日大笑大喊：「拍喊戲前我會不斷聽悲情歌，同埋諗啲曾經唔開心嘅往事，好似親情或者愛情史。（愛情經歷慘？）有一、兩段慘，因為用情好深。」