麥浚龍新歌主角係阿嬌？四大線索同你搵！

呢一星期全城集體中咗「羅生毒」，講緊嘅係麥浚龍（Juno）同謝安琪（Kay）合唱嘅神曲《羅生門》！首歌之所以成功彈出，因為個故事足足用咗十年嚟鋪排，故事中個男仔同舊愛分咗手後，依然念念不忘對方十年，奈何發現原來個女主角已經忘記咗自己，簡直就好似一忽一忽肉割落嚟咁痛，正正因為咁亦令大家產生唔少共鳴，尤其係班「毒男巴打」！

而最近好多網民都開始大起底，齊齊估吓現實版《羅生門》嘅女主角係邊個，究竟係何方神聖可以令Juno「喜歡十年仍不休」。最終大家都認為呢位「耿耿於你心六百周」嘅女仔就係Juno陳年緋聞舊愛鍾欣潼（阿嬌），《東網》第一時間深入解構呢首年度神曲，發現有四大「金曲藏嬌」嘅線索！

1.「情」有相似

首先《羅》嘅故事與當年「龍嬌戀」嘅時間、背景都相當脗合，有傳2006年Juno開始情傾阿嬌，2007年就正式以短訊發動攻勢，同年喺電影《破事兒》後正式撻着。可惜當時有指阿嬌始終難忘上一個前度男友，「龍嬌戀」最終只係維持咗一年半就宣告玩完。而呢段塵封九年幾嘅舊情，同歌詞所講嘅「十年苦戀」時間、情節相似度高達99%！

2.「一」月之約

《羅》中最後一句歌詞「下個一月，願如期團聚於冰島某地方」，講述呢對戀人曾經約定過喺十年後嘅一月一齊去冰島旅行。登登登凳！咁啱得咁橋，阿嬌生日正正就係1月21日，令人聯想到呢個冰島之旅係唔係十年之前約定嘅「Birthday Trip」呢？真係好浪漫呀！

3.「Hate」囉吉蒂

《羅》入面令人聽得最心痛嘅一句歌詞，好多人都認為係男主角一直以為女主角鍾意哈囉吉蒂（Hello Kitty），點知換嚟對方一句「我愛過哈囉吉蒂嗎？似乎沒有」。再一次咁啱得咁橋，阿嬌原來曾經出席活動時，講過唔鍾意Hello Kitty，而係鍾情米奇老鼠。加上歌詞講到女主角唔鍾意睇漫畫，阿嬌喺一次專訪中都講過唔鍾意睇漫畫，因為唔想諗嘢呀！

4. 翻版「Kay」型

有指Juno今次之所以搵Kay做《羅》女主角，係因為睇中佢同阿嬌都係屬於大大眼、尖尖面嘅女神Type，加上Kay同阿嬌年紀都係比Juno大，可以話係搵Kay「延續」呢段姊弟戀！Kay亦大爆同Juno合唱時，感受到對方投放咗唔少感情落去：「同Juno對唱，佢好似對女主角有濃濃感情，Feel到嗰種苦澀同甜味。」

我哋「FF」咗咁耐，係時候聽吓兩位當事人點樣回應，不過似乎佢哋都冇直接否認喎！Juno經理人公司回覆就話：「唔想引起其他人多想，同誤會咗Juno同黃偉文原本創作嘅意思，同埋多謝網民創作力。」至於身在內地工作嘅阿嬌就透過經理人回覆話：「聽講首歌冇寫特定嘅對象，但首歌的確係好聽。」