胡杏兒唔會貼錢嫁：娶得我咪人哋畀！

藝人胡杏兒在廣州長隆野生動物世界出席「全球唯一大熊貓三胞胎周歲慶典」，與4000幾名觀眾齊齊為大熊貓萌萌、帥帥和酷酷慶祝一歲生日。而園區亦特意為牠們三姊弟準備特別生日蛋糕，不過未知是否怕醜，在享用蛋糕之前其中一隻大熊貓竟然想返房避風頭，相當搞笑。

身為代言人之一的杏兒，就坦言今次是她首次親睹大熊貓三胞胎真面目：「之前做嘢冇同熊貓接觸，我係負責猩猩嗰邊，今次見到佢哋覺得好得意。（冇得掂好失望？）係囉，我好想呀，但都係為咗保護佢哋。」更自爆自己在後台求摸大熊貓，但不獲准，又指三胞胎是自然妢娩，非人工受孕，非常難得。

開心事唔會保密

記者其後恭喜最近屢傳婚訊的杏兒，她聞言即笑謂：「恭喜我有三胞胎呀？」記者就表示她再被指嫁杏有期，她否認之餘更指一切以本人公布作準：「好多傳聞話我去英國結婚，點解有啲咁嘅事我唔知，不過現階段我冇嘢宣布。」

談到最近杏兒在微博中透露自己首次為父母下廚，問她是否為嫁人做準備？她笑謂：「我呢啲年齡練吓差唔多架喇，都要學吓呢啲嘢，唔係生活會好乏味。」至於講到林夏薇最近秘密閃婚，她就表示自己非常佩服對方：「呃到你哋真係好犀利，過程咁保密，一定要好多功夫，好辛苦。」問她會否效法林夏薇秘密出嫁？她就指自己不會：「咁辛苦喎，為咗件咁開心嘅事。」又指將來婚禮會尊重另一半的意願。

有指杏兒倒貼200萬嫁人，她笑謂：「咁平？講笑啫！總之未有咁嘅安排啦！唔回應喇，亂寫作故仔，唔係事實。」問她會否介意全資貼錢出嫁？她笑謂：「點解要我畀晒？我唔理架喇，人哋娶得我咪人哋畀！」又指最重要是誠意。另有指她期盼童話式婚禮，她謂：「唔係我要嘅嘢嚟，寫嗰個太唔了解我喇！」又指這個工作是無綫在較早前為她接洽，新公司最新消息要稍後才能公布。