避談老公20億身家　林夏薇寧搵錢唔度蜜月

藝人林夏薇出席某護膚品牌新店揭幕儀式，新婚數天首次亮相公開場合的她，在活動期間，不時洋溢出幸福甜笑。夏薇上周六秘嫁44歲金融才俊Jason，於山頂一座豪如「堡壘」的超級豪宅低調舉行婚禮，正式升格成為「人妻」，對此夏薇大方接受傳媒恭賀：「好開心見到大家！其實都唔係神秘！因為啲人覺得好突然，但我哋就唔覺得好突然，因為一路都有（結婚）諗法，只不過大家忙緊，我一路拍緊劇！我最開心喺啱嘅時間，遇到啱嘅人，然後做啱嘅事。（同老公拍咗兩年拖？）差不多！」

暫未打算生B

問到是否雙喜臨門才趕住結婚，夏薇笑着否認消息屬實：「其實冇，我自己都想！我同先生都好鍾意小朋友，但各有各忙，但依家想享受二人世界先。同埋以工作為先，因為我好熱愛我嘅工作。（傳你會慢慢淡出娛圈？）暫時未有呢個諗法！（咁老公嗰邊有冇提出過？）冇！佢好支持我做每一樣嘢，好開心佢支持我，不過佢最近壓力都好大，因為佢唔係圈中人，我唔希望我嘅藝人身份，影響家人生活。（婚禮籌備咗幾耐？）好快，兩三個星期！之前忙住拍劇，拍完之後有空檔，時間夾就決定舉行。（點求婚？）秘密！其實每日開心都係求婚。（兩方家人有冇催生B？）都冇！屋企人都好支持我。（老公身家豐厚？）佢同我都係靠自己努力，一步一步行，所以佢唔想因為其他事影響到佢工作。（嫁入豪門？）我哋冇諗呢啲嘢，兩個人開心結婚，組織自己家庭。」

避談結婚禮物收物業

夏薇透露新婚後立即展開工作，暫時未有計劃與Jason度蜜月，直言今天活動是婚後臨時加的，但就避談酬勞：「酬勞係開心價！（幾位數字？）要問番佢哋（大會）！（唔使睇價錢接工作？為興趣？）份工係自己好鍾意，繼續努力腳踏實地！（今日唔戴結婚戒指？）結婚時戴咗咪得囉！唔使日日戴。（結婚戒指有幾卡？）我覺得佢送幾多卡我都開心，因為係一個心意！（催吓堂哥林峯結婚？）咁要問番佢！」而問到Jason可有送上特別結婚禮物，例如新樓或者家傳之寶？夏薇則不願多提：「我阿媽得我一個女，我已經送咗畀佢！（最近係咪送咗西貢匡湖居物業畀你？）所有關於屋企嘅嘢，或者任何嘢我都唔答啦！想保護番屋企人，唔想佢哋受到任何干擾！」