張智霖承諾搣甩電子產品三個月

藝人張智霖（Chilam）出席某護膚品牌新店揭幕儀式，表示非常注重眼部健康，因長期使用電子遊戲產品，近日決定實行在三個月內拒絕接觸：「畀電子產品荼毒咗好耐，視力都減退得好犀利，上少啲社交網站，拎本書睇下，以前睇書都會有休息時間，十分鐘都好，依家休息都拎部電話出嚟玩，根本冇休息過！（同屋企人少咗溝通？）同屋企人溝通都難，依家趨勢每個人返到屋企，都揸住部電話或者平板電腦，好靜咁，反而冇咗好多溝通，想保留同屋企人傾計嘅融合！（兒子都成日玩？）都多！但都好難，係一個趨勢，家庭溝通都好重要！我承諾先放低三個月，視力好差，唔知道有冇老花，個仔冇近視，但係再係咁會有！」

問到可有祝賀同場的林夏薇新婚？Chilam表示已立即道賀，亦有互相分享夫妻相處之道，但就不知其老公Jason是他曾代言品牌的高層，當時他與夏薇更為品牌一同拍攝廣告：「我唔知，原來如此！（當時Jason有冇去拍攝場地監場？）冇喎！其實個廣告係分開，都冇同夏薇見過面！」