張繼聰落場打波　謝安琪化身小粉絲：射呀

謝安琪（Kay）化身老公張繼聰粉絲，帶同仔仔張瞻入場觀看老公打籃球，「女神Kay」睇得肉緊，不時七情上面，拍晒手歡呼，更大嗌：「射呀！」完場後再充當助手，為老公攞背囊，呢個人妻相當貼心。

當日下午於電台工作後，Kay乘七人車離開，架車轉個彎即見老公張繼聰同埋仔仔張瞻在私家車上等候，有老公接，Kay馬上過車，一家三口溫馨地往尖沙咀行街食飯，活潑的張瞻不時嚷着看玩具，其間有fans上前要求合照，兩公婆二話不說地答應。

及至醫肚後Kay一家三口再往大角咀，為老公出賽做啦啦隊，同場更有方力申。張繼聰和方力申等換上球衣即開始熱身，坐在觀眾席的Kay甜絲絲地望實老公，目光一刻都沒有離開過老公，及至老公出場即拍晒手歡呼，跟隨現場觀眾一齊大嗌「射呀！射呀！」為老公打氣，十足一名小粉絲。

比賽完結後，跟得夫人的Kay帶同仔仔陪同老公及隊友到附近茶餐廳醫肚，其間更做埋阿四，幫老公攞背囊，而張繼聰亦識做地匆匆食飽便先去取車，再將座駕駛回來接老婆和仔仔，一家三口齊齊回家休息。