森美自爆畀老婆推開：佢唔想小朋友曝光

藝人森美下午出席維特健靈所成立子公司「健靈Genning」開幕活動，為該健康產品做代言人已經八年了，他說：「係我代言過最耐嘅品牌，代言咗之後我都成為健康顧問，做咗咁多年，身邊朋友同事都來問我好唔好用。我都會介紹吓，依家可以做埋生意。」森美又大讚產品對家人親戚都好，他又透露自己之前好容易感冒，食用產品後抵抗力變強了。

另外講到有傳森美自從簽了黃柏高公司後，將家人收得好埋，但有一次拍電影話森美有戀腳癖，森美即高調拖老婆現身，但見到fans，森美即推開老婆。對於此事，森美聞言後即笑言：「我老婆推開我就有，開始到依家我都好尊重佢，有時候有首映，佢知有記者會唔去，好低調。之後有搵食嘅，太太都唔鍾意，佢唔想小朋友曝光。試過有fans嚟要求簽名合照，有fans更要求同埋我小朋友一齊，我哋都會話唔好，太太會拉個仔走。」至於有廣告搵夫妻檔或者一家出動，森美都話就算酬勞多高，太太都不肯。

森美更提到有一次，有人邀請森美與小朋友一齊工作：「我有同老婆講，但太太一定唔會，太太一向都唔鍾意，我都尊重佢，但小朋友話想拍，太太就叫我哋傾。（之後點？）依家傾緊錢銀問題，係拍video節目。」

提到好友梁嘉琪有戀情，森美笑言：「冇人話我知，我哋冇講佢戀情。依啲一講出嚟就冇，一冇就十年都冇，好似小儀咁，係我身邊嗰啲都係咁。」