周麗淇預習做湊囝婆　餵奶掃風一腳踢

藝人周麗淇（Niki）晚上出席adidas x 曼聯慶祝派對，Niki穿上運動裝，卻故意拉高拉鍊露臍，略為性感！而Niki現場見到前曼聯球員Lee Sharpe沙柏後，更與對方聊天過不停。

提起Jacques一面冧爆

提到Niki在微博上載抱着姨甥仔Jacques的合照，而Jacques更識對她嘟嘴，Niki就透露：「我啱啱先玩完（BB），喺家姐度食埋飯先過嚟。今日係Jacques滿月，食咗紅雞蛋。（送咗咩滿月禮物畀BB？）BB用品，其實屋企人之間送禮物已經唔係咩事。依家最想係見佢，我怕我走咗之後BB會唔同樣，佢依家成日都唔同樣。我今日餵咗奶，佢又有游泳。」

大讚Jacques靚仔

Niki又坦言自己好鍾意湊BB，力讚Jacques好靚仔：「點都靚，無論掃風、瞓覺、游泳、依依呀呀、喊嘅樣。（會唔會快啲同男朋友生番個？）唔使，依家屋企人所有集中力都喺佢度，過多幾年先。屋企依家好熱鬧，四代同堂，今日婆婆個啲都係度。（男朋友有冇見過BB？）無呀，我自己都要成日飛。我一落機即刻問我家姐（周汶錡）BB瞓咗未，我家姐話『乜你唔係嚟睇我架咩。』佢依家坐完月好快出嚟見大家。我遲吓又要返大陸，到時佢哋搞百日宴我都唔喺香港。」

籲畀鄭嘉穎陳凱琳空間

另提到有傳陳凱琳到橫店探男友鄭嘉穎班，更長時間匿藏於嘉穎所租的露營車內，有人更聽到當兩人在車上時傳出「怪聲」。對於舊愛與女友打得火熱，Niki即笑笑口說：「唔好問呢啲啦，都隔咗咁耐，人哋有自己生活，拍拖開心咪得囉，應該畀啲空間。（你自己會否探男友班？）私人問題唔答。」