傳王菀之賣樓蝕200萬　馮翰銘揚言包三餐！

歌手王菀之（Ivana）與音樂人馮翰銘（Alex Fung）將與香港管弦樂團合作開騷，他們笑言被封為「樂壇神鵰俠侶」，自封是「神鵰」的Alex表示：「今次演唱會好雕琢，好仔細，唔寫足樂譜都拉唔到啲樂器。」

Ivana表示父母曾舉行古典音樂會，當時她只能在台下做觀眾：「今次好開心可以同出道以嚟嘅拍檔演出，覺得好榮幸同驕傲。我唔會唔敢彈琴，要練，規模唔會細過平時演唱會。」他們表示演唱會不會邀請嘉賓，因舞台地方有限，台上已容納近80人的樂團成員。Ivana又自爆會與Alex會比試鋼琴琴功：「唔可以話係Battle，鋼琴上合作，要苦練，要最佳狀態。同埋舞台劇有日夜場都已經得半條人命，唔試過音樂會做日夜場。」

海報上的Ivana戴上花環頭紗，問到屆時可會有「喜事」宣布？她說：「唔會有好消息喺當晚宣布，音樂為主，其實主要係花，因為今次講音樂芬芳，刺激大家嘅觀感。」

提到有指Ivana轉讓灣仔豪宅單位，虧蝕200萬一事，她表示：「唔講私人事啦，唔回應呢啲。」在旁Alex聞言即「雪中送炭」：「真架？保證佢嚟Studio會請佢食飯，無論佢係賺定蝕。」