林祖輝力撐老婆姚嘉妮冇偷食

藝人姚嘉妮與林祖輝結婚八年，育有一子一女，幸福滿瀉，嘉嘉由亞姐出身跳槽無綫後，以拍劇及做主持為主，閒時喜歡與同是亞姐的好友陳煒去學跳舞，而祖輝離開娛樂圈後就開設童裝生意，昨日兩人才為兒子慶祝三歲生日，今日突然有報道指嘉嘉背老公搭上菲律賓籍跳舞老師，還指兩人拖手斷正。對此嘉嘉與祖輝齊聲否認，指報道為笑料一則，兩夫妻關係完全未有動搖。

嘉嘉說：「今早電話響不停，好多謝愛錫我哋同關心我哋嘅人，其實都唔需要澄清啲乜嘢，清楚我嘅家人同朋友，一定知道唔會係真，我經常都去跳舞，同跳舞老師、一齊學跳舞啲人已經成為朋友，學跳舞之餘經常一齊去街食飯，對方係外國人，性格比較熱情，我都係接受外國教育，大家好傾得埋，但絕對唔係拖手，啲相係借位，令人有錯覺，我覺得唔需要避忌，相反覺得對跳舞老師好唔好意思，佢唔係圈中人，上次已經畀人寫過同煒哥傳緋聞，今次又輪到我，希望對方唔好唔同我哋做朋友。」

嘉嘉又說：「呢單緋聞唔需要澄清，但有樣嘢必須要澄清，就係周刊寫我38歲，呢樣我好介意，我只得36歲，下星期先37歲生日，78年出世咁都計錯數。」

至於祖輝亦挺身為老婆澄清：「我覺得呢單嘢真係好流，係好無謂嘅新聞，上次啲周刊就特登將合照cut走我老婆，寫煒哥同跳舞老師嘅緋聞，今次就調轉cut走煒哥，其實我老婆經常同跳舞啲人一齊去飲嘢食飯，真係好平常，至於話我落寞去飲酒仲好笑，當晚其實係約咗拍檔練海棠傾廣告嘅事，係練海棠話想食大牌檔，並唔係我借酒消愁，我老婆facebook入面夠好多一家四口去玩嘅相，又唔見會登出來，所以覺得真係好好笑。」