Eason《黑洞》同星際啟示錄Match到爆

曾執導科幻電影《Inception》（潛行空間） 嘅大導演Christopher Nolan，去年拍咗套再次令人拍爛手掌嘅電影《Interstellar》（星際啟示錄），男主角Cooper為咗搵另一個適合人類居住嘅星球，忍痛離開女兒Murphy去探索宇宙，期間Cooper因為誤墮另一個空間而遲遲無法返回地球，Murphy於是拚命去拆解宇宙奧秘將爸爸拯救出嚟嘅故事，當中所帶出嘅父女情同時空交錯嘅畫面，令唔少網民為之驚歎呢個鬼才導演嘅思維。而作詞人潘源良早前就為歌神陳奕迅（Eason）作咗首歌《黑洞》，雖然首歌就唔係講宇宙探索，不過可能比個歌名影響到，有網民就發揮創意，將首歌同《星際啟示錄》嘅片段剪輯埋一齊，當中有幾幕又真係好夾，網民睇完都大讚超match又有共鳴，仲想將個MV推做官方正式MV啊！

網民覺得最match嘅一幕，就係副歌唱到「但你轉到某一個時空，失去了互通，今天儘管可始終相擁，眼裡卻沒溝通」嗰陣，畫面就影住Cooper墮入另一個空間，隔住個書架見到Murphy但出唔到去同女兒重逢，仲有Cooper喺太空船入面望住女兒錄畀佢嘅video，眼神充滿住寂寞同哀愁，網民話視覺加上聽覺嘅衝擊，即刻聽到佢哋流晒眼淚，而MV入面不時加入Cooper自己一個喺太空船入面嘅落寞表情，亦同全首歌所表達嘅寂寞心情相互呼應。

網民對個MV熱烈讚好之餘，一度以為呢個就係官方MV，亦有網民話可以整返首女聲版，唱返Murphy對爸爸嘅思念喎！

網民有話兒

Kexxxx Li:推到變official MV. 根本就係寫緊INTERSTELLA

mxxx lxx Chxxx: 呢首歌同Intersteller真係好match，一開始聽已經有呢個感覺

kixxxix:睇完mv喊左無數次，老豆隔住書架叫個女真係好慘

maxxam:雖然歌詞同套戲意思唔同，不過望住畫面再聽住醫神嘅正爆唱腔，真係覺得好鬼正!

我xx去別xxxx水:唔知會唔會有女聲版出呢